ანდროგენეტიკური ალოპეციის სამკურნალო პრეპარატები მათი მოქმედების მექანიზმის მიხედვით იყოფა სამ ძირითად ჯგუფად:

1. დიჰიდროტესტოსტერონის (დჰტ) ბლოკატორები – რომლებიც ახდენენ დჰტ–ის სინთეზის ბლოკირებას. ეს ჰორმონი აზიანებს თმის ფოლიკულს და არის მთავარი დამნაშავე ანდროგენეტიკური ალოპეციის განვითარებაში. ამ ჯგუფის პრეპარატს მიეკუთვნება ფინასტერიდი (პროპეცია, პროსკარი). მისი მოქმედება მდგომარეობს ფერმენტ 5 ალფა–რედუქტაზას შეკავშირებაში, რომელიც მამაკაცის ჰორმონს – ტესტოსტერონს გარდაქმნის დიჰიდროტესტოსტერონად.

ფინასტერიდი ინიშნება 1 მგ დღეში ერთხელ. ეს პრეპარატი განკუთვნილია ხანგრძლივი მოხმარებისათვის (12–24 თვე). მისი მიღების შეწყვეტიდან 9–12 თვეში დჰტ ისევ იწყებს დამაზიანებელ მოქმედებას თმის ფოლიკულებზე.

ქალებში რეპროდუქციულ ასაკში ეს პრეპარატი არ ინიშნება, მისმა უმცირესმა რაოდენობამაც შეიძლება გამოიწვიოს ნაყოფის განვითარების ანომალიები.

პროპეციის მიმსგავსებული პრეპარატებია: ფინპეცია, ფინაქსი.

პროსკარის მიმსგავსებული პრეპარატებია: ფინკარი, ფინასტი, პროსტანი, პროსტერიდი, პენესტერი, ვერო–ფინასტერიდი, ალფინაპი.

2. ზრდის სტიმულატორები – რომელიც ახდენენ თმის დეგრადირებული ფოლიკულების აქტივიზაციას და ჯანმრთელი თმის ფოლიკულის განვითარებას. ამ ჯგუფის პრეპარატია მინოქსიდილი (როგაინი, რეგაინი). ამ ჯგუფის პრეპარატები ვერ აფერხებს თმის ფოლიკულების დაზიანებას. ეს პრეპარატები უმჯობესია დაინიშნოს იმ მედიკამენტებთან ერთად, რომლებიც ეწინააღმდეგებიან ფოლიკულის დაზიანებას.

ეს პრეპარატი არის გარეგანი მოხმარების, რომელიც გამოიყენება თავის მშრალ კანზე 2–ჯერ დღეში 2% ან 5% ხსნარის ან სპრეის სახით. ქალებში უფრო გამოიყენება 2% მინოქსიდილი. მისი მოქმედების დადებითი ეფექტი შეიმჩნევა 3–6 თვიდან.

მინოქსიდილი და ფინასტერიდი არის ანდროგენეტიკური ალოპეციის სამკურნალო ძირითადი პრეპარატები, რომელიც მოწოდებულია ამერიკის წამლებისა და კვების პროდუქტების ადმინისტრაციის (FDA) მიერ.

3. ანტიანდროგენები – იცავს თმის ფოლიკულის ანდროგენულ რეცეპტორებს დჰტ–ის დამაზიანებელი მოქმედებისაგან. ამ ჯგუფის პრეპარატებს მიეკუთვნება სპირონოლაქტინი. ის ძლიერი ანტიანდროგენია. მისმა შიგნით მიღებამ შეიძლება გამოიწვიოს გვერდითი მოვლენები. მისი გარეგანი მოქმედების დროს მცირდება დჰტ–ის რაოდენობა სკალპზე, წარმოიქმნება ესტროგენები, რომელიც ახდენს თმის ზრდის სტიმულირებას. ეფექტურია სპირონოლაქტონის 5% ხსნარის და 5% მინოქსიდილის ერთდროული დანიშვნა.

ანდროგენული ალოპეციის სამკურნალო სხვა პრეპარატებია:

ტრიკომინი, ფოლიგენი – ადგილობრივი მოქმედების, სპილენძის პეპტიდების შემცველი ნატურალური პრეპარატებია, რომლებიც ახდენენ თმის ზრდის სტიმულირებას, აქვეითებენ ფერმენტ 5 ალფა–რედუქტაზას აქტივობას. პრეპარატის გამოყენება შეიძლება ყველა ტიპის ალოპეციის დროს მამაკაცებში, ქალებში და ბავშვებშიც;

დუტასტერიდი (ავოდარტი);

პრომოქსი;

Spectral DNC;

Ell Granell Alfa (Pantostin);

პროცერინი – რომელიც არის ბუნებრივი ინგრედიენტებისაგან შედგენილი ახალი პრეპარატი. ახდენს დჰტ–ს ბლოკირებას. გამოიყენება მხოლოდ მამაკაცებში.

და ბოლოს:

ნიზორალის შამპუნი ფინასტერიდთან და მინოქსიდილთან ერთად შედის ანდროგენეტიკური ალოპეციის მკურნალობის „ ტრიადაში“. ეს შამპუნი არის ქერტლის და სებორეული დერმატიტის სამკურნალო საშუალება. ის აგრეთვე ასტიმულირებს თმის ზრდას.

უნდა გვახსოვდეს, რომ ანდროგენეტიკური ალოპეციის სამკურნალო პრეპარატები, მათი გვერდითი მოვლენების გათვალისწინებით, ინიშნება მხოლოდ სპეციალისტის მიერ!